名廚

营业中

休息中

难得星期六谂住一家人去饮茶，家姐话喺网上面见到呢一间古天乐顶手嘅酒楼，决定一家四口嚟试吓。地点唔算好就脚，喺铜锣湾同天后中间....但为咗揾食，特登走去试吓。酒楼系一楼，地方细细，感觉舒服。价钱有啲奇怪，因为点心纸上面写到明大中小点一律$46。等左大半个钟，终于嚟咗两个点心，柠檬叉烧酥同烧饼。几好味。再等多20分钟，五代同堂炒饭终于嚟，好干身，味道都唔错。坐左超过一个钟，只系食咗两个点心同一个炒饭，其他嘢全部未上。望吓身边嘅茶客，好明显系熟客，职员会特别招待，讲多两句，而且嘢食都上得好快系咪因为我哋唔系熟客所以要等咁耐？因为等得太耐，我已经唔记得咗仲有啲咩未你，就问下职员....佢完全唔需要check电脑，已经直接答我有咩未上。事实好明显系熟客就好好招呼你，新客嘅就唔该你等下先⋯⋯总括嚟讲，味道系唔错，职员都会好有礼貌咁答你‘已经整紧’。如果你系好得闲嘅，又唔介意被歧视，绝对可以黎试吓。我自己就觉得，香港咁多好嘅餐厅，我唔会再嚟。