葵 (已結業)

呢间喺尖沙咀新开嘅拉面店只系开左个几月，其实应该仲系探索味道阶段中，三位香港后生仔坚持自己理念去打造一碗清爽美味嘅淡丽系拉面，店家主打鸡白汤，咁我当然亦系点左碗鸡白汤拉面，先试汤底，好香鸡油味但又唔会好油腻感觉亦唔会太浓，属清淡中带出鸡油香味，而面条系幼面，几香麦同蛋味，但面条比较易淋放一阵就已经淋，低温煮鸡叉烧比想象中做得好，微微黑椒香味，肉质好嫩滑，而豚叉烧亦唔错，大块之余仲比一般拉面用叉烧厚好多，叉烧肉味够而调味同浸嘅时间都掌握得几好，够滑又有咬口，半熟玉子又系水准之作，食完面同三位老板倾左一阵，原来佢哋以前从未接触过饮食业，今次系大胆去将自己喜欢嘅味道同理念去煮拉面，希望可以煮一碗清淡鸡白汤拉面比客人，佢哋话希望可以令客人食到一碗连汤都饮晒嘅拉面，佢哋会好用心去问每位食完面嘅客人意见再作参考改良，而佢哋都知道面条仲有改善空间，希望下次嚟嘅时候可以有所改良，总括碗拉面系ok嘅，最重要系要支持本地创作，几位后生老板睇得出佢哋都好有心去做好碗拉面。