紅煮意

营业中

休息中

油麻地百老汇电影中心位置偏僻，但原来附近都有间性价比高嘅餐厅，以后睇完戏就唔洗行到咁远揾食啦。时下香港有live music嘅餐厅唔多，就算有都可能系高消费嘅地方，但红煮意逢星期六晚就提供一个平台俾本地歌手或组合去表演，分享佢哋嘅音乐，实行宣扬本地文化，值得支持！食物方面以西餐为主，扒类可以选择单点或者跟餐，我同友人就点左肉眼牛扒同羊架。餐包系烤得香脆嘅法包，餐汤系蕃茄汤，随餐附送嘅果汁就系苹果汁。肉眼牛扒拣咗五成熟，大件头，肉质腍滑，配有少量沙律菜消腻，薯蓉亦非常幼滑。羊架烧得外层香脆，肉身有咬口但唔韧，加上油香同本身嘅羊膻味，十分可口。酥炸软壳蟹，份量都大，炸得外脆内软，咬落去肉汁流出，配埋沙律酱，推介！苹果雪葩，卖相一流，打开个盖，入面系清新嘅雪葩，可以挖埋旁边嘅苹果肉，用作一餐嘅结尾都不失为一个好选择。