梅丘壽司の美登利総本店 (雅蘭中心) (已結業)

今日放咗半日假 ,嚟到呢度食lunch ，之前都试过晚餐， 虽然比日本贵啲，但系都好好食 ，尤其系吞拿鱼，所以今次试下个吞拿鱼丼。分量都几大，有2大片大拖，2大片中拖，2大片赤身，吞拿鱼蓉同角切吞拿鱼， 6片大大片鱼生，一定要用大大片嚟形容，因为真系要分三啖先食得晒，赤身浓味，中拖有齐鱼味同埋鱼油香味 ，系最好味，至于大拖 ，十分对版 ，冇筋之余鱼油香十足，质素高，不过碗饭太大，我𠮶时已经食得好饱，觉得滞咗啲( 纯粹个人食量问题)，好正。至于蒸蛋， 质感系比较硬嘅一种， 唔会一笃就散，仲有有好浓嘅蛋香，食到落碗底有一小片带子同埋一只小虾所以个茶碗蒸好有海鲜味，高质。 至于面豉汤，应该系红面豉沟白面豉，唔系好咸。总括嚟讲，呢个价钱呢个质素绝对食得过， 因为普通一个吞拿鱼饭都要200蚊以上， lunch计埋加一都唔洗220算系几抵。