大喜屋 (已結業)

今日放工和妹妹黎到尖沙咀行街，所以就系附近揾野食。最近天气又暖番小小，就想食日本野，咁放题就系最好既选择。刺身，寿司，炸物，同熟食都有！今日餐厅安排左我地坐卡位，好阔落，好舒服。首先，我地每样刺身都叫左试下，赤贝同象拔蚌都好爽，好鲜味。带子切到细细粒，岩岩好一口食哂。除左寿司，仲有手卷，细细地，唔太饱，可以叫多几份。我地就食左海胆手卷，好多海胆，紫菜脆卜卜，舔舔脷！之后想点番啲热野，牛肉锅同炒菜。然后见到有个榴梿爱好者必食，即刻心心眼。个脆炸猫山王黎到系热辣辣，个流心好滑，面粉唔多，超好食，好劲榴梿味。食到咁上下，想食啲小食，好食又唔饱肚既！所以我地就叫左凤爪，八爪鱼同子姜。凤爪去骨，甜甜地又辣辣地，加埋啲子姜，非常开胃，抖下又可以再食过啦！然后再叫左个鸡汤，暖番个胃，正呀！咁食日本野，又点少得清酒呢，可以拣冻或热。我觉得个清酒清清地，好易入口。menu仲有梅酒可以拣，不过今日就够啦，下次再饮！最后埋单前，待应俾左张雪糕纸我地，每人只可叫一杯，我就要左季节限定，原来系冲绳海盐味，好好食，咸咸地，劲有奶味，非常满足。下次朋友或屋企人生日，一定会再黎，位置好大，可以叫多啲人！