真味鮮廚 (已結業)

偶尔放题式打边炉，感觉好减压，唔洗谂，想食就叫。当然啦咁就要去间有质素既，今晚去左真味鲜厨。一坐低就有惹味嘅鸡煲开胃，侍应好好帮我地搞，确保唔痴底，鸡件大大件，好肉地，叫左小辣，煲耐d洋葱够淋又甜，如果唔够食重可以再添食。之后上埋刺身拼盘，有甜虾、带子、三文鱼腩、鲍鱼、八爪鱼等，摆盘靓靓，而且三文鱼腩特别厚肉。汤底有胡椒萝卜排骨汤，够胡椒味但又唔会好辣，而且大大件猪骨，好足料。今晚好D既我地当然拣左龙虾啦，龙虾劲新鲜，上枱时重见到d肉弹下弹下，烚5分钟，啱啱好，咩都唔洗点，鲜味已经够晒。另外蛏子又系一赞，大大只，长过我手掌有多，肉厚弹牙。鱼类有脆肉鲩和龙趸肉，龙趸肉质实净，唔会烚两下就散，证明好新鲜。海鲜拼盘重有海虾、青口、带子、蚬等。打边炉另一主角，特级安格斯肥牛，有牛味，而且雪花分布均匀，有油香但唔油腻。另外火锅必食有大大粒好足料既水饺，满满既虾肉、木耳…正～之后重叫左虾滑、冰豆腐、新淮山、炸鱼皮，数之不尽。饮品任饮，啤酒、汽水、乌龙茶咩都有得饮，重有百香果汁，总有一款啱饮，而且自助区重有几款头盘小食。