快靚正燒味粉麵茶餐廳 (已結業)

唔系家庭聚会都未必咁齐人，为左同班亲戚联谊，妈子竟然话要亲自下厨招呼佢地，但点知最后都系揾着我黎搞。临时临急唯有斩料加𩠌应付班大帝。快靓正名副其实真系快靓正，由落单到拎走前后都唔使５分钟。味道仲好唔错呢。店面同普通烧味店大同小异，但左右分开为堂食同外卖。烧鸭烧鹅滴晒油咁，真系十分吸引。眼见师傅手起刀落斩斩斩，不消一会就将各式各样烧肉／叉烧／鸡鸭斩好切好。所有烧味放晒系师傅面前，拣要边样就即刻取下切件。最紧要就系快！烧鹅。半只烧鹅油脂充足，虽然拎到返屋企有少少腍，但放入焗炉加热返，香味依然。肉质结实膻味唔会太劲，沾上冰梅酱以酸甜味道中和油腻感，真系好食。油鸡AND切鸡。因应大家口味各要左半只，两样都好嫩滑。就算鸡胸都唔会好柴，尤其系油鸡上色均匀，偏甜嘅酱油味道比葱油更惹味。叉烧。有瘦叉同半肥瘦叉混合，呢样系大家都赞不绝口嘅一道。因为烧得香口之余带少少㶶边，肉质腍中带咬劲绝无松肉粉腌制嘅可能。单单配上一碗热腾腾嘅白饭已经滋味十足，咸甜适中嘅蜜汁更加系捞饭之选。小小的一餐斩料加𩠌，令到大家都食得好满足，今次妈子又系班亲朋戚友面前攞晒分了。