愛家國際餐飲 (已結業)

星期日得我同妈咪两个人食lunch, 唔想饮中茶食点心，亦唔想食茶记咁肥腻，一于去食素。横掂我同妈咪都钟意食素。本来想去近排人气嘅素食主义，不过北角有d远，念起湾仔爱家素食，即刻起行。爱家由轩尼斯道搬左去湾仔道，仲上埋楼，真系生意难做。上到去差唔多2点半，竟然有下午茶优惠（8折）。我地点左爱家漫波排饭餐加素蛋，同埋冬阴公海鲜汤跟餐（包红曲米饭同是日餐汤）。爱家系自助快餐式，自助到收银处点餐，佢会叫号码取餐，水同餐具都系自助，逢星期六日都有人注场弹结他唱歌，几homely.爱家漫波排饭其实系日式素鳗鱼饭，跟红曲米饭，汤，炒菜，同沙律。是日餐汤系西洋菜罗汉果汤，好清甜滋润，沙律内含青瓜丝同千岛汁，炒菜冇蒜，清新可口，至于素鳗鱼，味道口感直情可以假乱真，外皮脆兼有照烧汁味，内里软糯，非常好食，素蛋外形似煎荷包蛋，实质系腐皮扮蛋白，薯仔茸扮蛋黄，味道唔错，虽然冇任何蛋味。冬阴公海鲜汤都几大窝，不过太咸，好彩里面嘅素海鲜冇吸晒d咸味，如果唔系真系要送几碗饭，汤内有豆腐，腐皮等等，味道一般。本来想试埋甜品，见佢有忌廉蛋糕，冇蛋嘅雪糕，南瓜布甸等等，不过太饱，唯有等下次再试。