越一越南牛肉粉專門店 (已結業)

今日突然间好想食越南野！于是就去到荃湾呢间喺路德围附近嘅越南嘢食下午茶！整体环境都几唔错坐得几舒服，下午茶时段又唔系话好多人所以都安排左我哋坐卡位！梳化都坐得几舒服！下午茶来讲餐牌都几多选择，有饭有面，+10几蚊仲可以加个小食！食越南野点可以冇檬粉呢？于是我哋就叫左一个薄烧牛肉捞檬。虾头膏做嘅汤都系越南野其中一样特色，于是我哋就叫咗酸辣虾头膏扎肉汤檬粉。小食就叫咗一个椒盐软壳蟹！嘢饮我哋就要左两杯鲜榨果汁，叫咗橙汁同埋菠萝汁。先讲讲个薄烧牛肉捞檬，牛肉个肉质几嫩，用料都唔差，师傅烧嘅时候亦都冇过火，唔会话烧到成块牛肉干咁。佢入面除咗有檬粉之外，仲有啲青瓜丝同埋木瓜丝，为呢碗檬粉带嚟左清新嘅感觉，夏天食就啱晒啦！之后就系酸辣虾头膏扎肉汤檬粉，虾非常新鲜，个汤都有好浓嘅虾膏味，应该用咗唔少虾头。而且份量都好大，下午茶来讲一定够食！小食椒盐软壳蟹嚟到嘅时候非常热！一定系即炸，而且全部都大大嚿，入面劲多蟹肉，性价比极高！最后就系嘢饮，喺出面餐厅食饭好少会饮到鲜榨果汁，橙汁同埋菠萝汁入面啖啖果肉，啱晒夏天饮！最后人均百几蚊但饱到爆！真系几抵食！