囍 (已結業)

年初一二三除咗大集团多数都要加一外另加其他小费，见到囍晚市打边炉限时90分钟，新春收费每人168，平平地同朋友共聚都唔错。囍位于宏利金融中心，近观塘码头，位置比较偏远。朋友话佢见平日返工中午多数做写字楼客日式午餐，最近先见有晚市边炉。新春套餐168包无限添加海鲜拼盘、黄金鸡、特选牛肉、黑豚肉同牛脷。拣选咗黄金鸡木瓜汤底，餐牌介绍用印尼椰子水，自家农场鸡同有机木瓜同滚，汤底特别又清甜，感觉上打边炉都冇咁热气。等汤底加入黄金鸡滚起时先出去攞前菜食著先。前菜有芝麻酱番茄、蟹柳火腿沙律同枝豆。切片番茄加上芝麻酱几惹味。蟹柳火腿沙律有少少肉味钓味好容易越食越多，要留肚食边炉。鸡肉刚滚起时食嫩滑又有鸡味。海鲜拼盘一人一碟，有原只鱿鱼连鱿鱼骨，好新鲜弹牙。生蚝滚熟都唔太缩水。本地青口同中虾味道鲜甜。黑豚肉同牛肉油花分布平均，可以任食真系几抵，不过其实每人一碟都够。牛脷薄切滚两滚就食得，爽口薄脆，同炆嘅食法又唔同。蔬菜种类有廿几款都几多，味道鲜甜，自己钟意食乜夹食，肉丸虽然系来货但都有肉味又弹牙。饮品乳酪雪糕自助，连加一每人唔使二百，虽然限时九十分钟不过真系算平。