澤田小廚(仔仔小廚) (已結業)

赤口日，年年的節目都係打牌，今年也不例外。打左成日，十幾個東，收場已是夜晚點幾鐘，三位雀腳都見肚餓，就在附近睇仲有咩野好食。另兩位人兄縑餃子皇環境太差，好在這裡未收檔，就入來幫襯。我發辦，要了沙茶醬雞軟骨、海棠骨、椒鹽白飯魚、仔仔炸蛋、煎蠔餅同大肚婆炒飯一碟。因為人多，都要等左一陣至有得食。沙茶醬雞軟骨用煲上，內有粉絲，濕濕的好送飯，大家見個勢，炒飯有排未到，拿拿林叫兩個白飯頂住先，都唔錯；海棠骨酸酸甜甜的，大部份朋友都唔會抗拒。一大舊肉用刀叉去分，煮得軟腍入味，又係好適合送飯，所以兩碗白飯一下子就吃完了，有水準；椒鹽白飯魚幾大條，炸得脆又香口，又係拿拿林叫兩枝啤酒來啤啤佢，都食得過；仔仔炸蛋是墨魚膠包著皮蛋來炸，加埋煎蠔餅熱辣辣又好味，又係吃得過。面對三味香口的送酒菜，兩枝啤酒一下子又飲完了；今晚的大肚婆炒飯炒得乾身，除了基本的炒飯配料如叉燒、蝦外，薑味都好濃郁，亦可以維持一貫水準。一輪風卷殘雲，食埋炒飯，真的夠皮了。埋單三百八十幾，食物都有水準，不會因為新年關係而有所下降，行過呢頭的話是值得一試。原來呢度初一至初五照開，初六至初九至收市，咁有腦如勤力，抵佢地咁夜都咁多人。