港味

营业中

休息中

今日约咗位亲友去油塘大本营食下午餐，佢介绍我和妈去间新开几个月，而装修唔似传统酒楼嘅食店饮茶。门口攞飞，等咗大概十分钟就有位，职员问我饮咩茶，我就话要普洱，估唔到系一人一个茶包，自己冲，我个人觉得比起旧式酒楼跟加好，因为感觉更加干净。我哋叫咗六样嘢食。最快到嘅当然系冷盘，四喜烤麸，好开胃，底下仲有白萝卜，酸酸甜甜，唔错！之后就等咗大约十分钟，其他点心就陆续送到，有松露野菌饺、杞子棉花鸡、蜜汁叉烧肠、蟹籽烧卖皇，以上所有点心都比预期中好食，而黑金流沙包嘅流沙唔会太甜，食咗竟然仲想再叫多个甜品试下，原本叫多个红枣糕，可惜无哂，最后拣咗个紫心香芋丸，口感有啲似煎堆，好味又唔会太甜。总结：环境及食物都唔错，职员服务态度亲切有礼，收费合理，总共$178，接受现金、八达通、支付宝、微信支付或信用卡付款，非常方便。有机会我都会再去食多次😋。