新蒸武門 (已結業)

今日同朋友喺观塘工厂区附近揾嘢食，喺骆驼漆附近揾到一间sell健康嘅中式菜馆。 入到去每张枱都放咗个好有特色嘅茶杯，入边已经有八宝茶嘅材料，杯八宝茶好香，味道好复杂，但加咗好多次水，味道依然好浓，好饮之选。 我哋叫咗个二人餐，我哋将两个头盘改咗做一个三色拼盘，另外我哋有两个是日炖汤，豉油皇虾，荷叶香菇蒸鸡，笼仔班头腩，浓汤杞子浸菜同虾仁鲍丝炒饭。 三色拼盘首先送上，入面有五香牛展，佛山薰蹄同花雕鸭舌。牛展好香，鸭舌有啲酒味，而佛山薰蹄亦都好爽脆。 之后是日餐汤都送上，今日餐汤系姬松茸节瓜螺片炖猪展汤，碗汤入面啲料好足，有瓜有螺片，而且一啲都冇味精。 仲有两只豉油虾，虾肉好新鲜弹牙，而且豉油都好入味。 之后系笼仔班头腩同荷叶香菇蒸鸡，笼仔班头腩啲肉好新鲜，同埋有啲蒜蓉香。之后系荷叶香菇蒸鸡，鸡肉好滑好弹牙。 仲有浓汤杞子浸菜，啲菜系娃娃菜，啲浓汤同杞子味入咗喺啲菜度，而且啲菜唔会太淋。 最后系虾仁鲍丝炒饭，啲虾好大只，同鲍丝都唔少，味道不错。