Kuru Kuru自家製手作意粉 (已結業)

8咪半呢个场装修后开左好多食市，今次食呢间系呢个场黎讲算新开，舖头细细唔多位，好在我黎到嘅时候冇乜人。坐低睇下个menu其实选择唔多，2页睇晒，价钱系1+2+3嘅概念，即系意粉系基本，每叫多一个汤/沙律/饮品就 on top 计钱，我就叫左个菠菜三文鱼忌廉意粉同德国香肠椰菜蒜蓉蕃茄意粉，另加钱叫左杯自制冰茶同热柠檬茶。意粉上枱嘅时候好香，放意粉只碟系热辣辣嘅，有助食物冇咁快冻，意粉因为系手作意粉，质感比超市买嘅包装意粉实、 烟韧、饱肚，碟菠菜三文鱼个忌廉汁好 creamy，但系食到尾如果冻左个汁会浆住个口有啲"漏"，而个德国肠因为有黑椒系入面，所以好香口，个汁反而系惊喜所在因为佢有蒜蓉，所以成件事就好香口。嘢饮方面杯自家制冰茶其实系普通红茶入面加左2旧橙，因为佢个切法问题，旧橙好难笃，变相杯嘢就只有红茶味，好在个茶底唔 溺涩。