新蒸武門 (已結業)

收咗工同屋企人去食饭，拣咗喺骆驼漆大厦嘅新蒸武门，睇个名以为系蒸炉式嘅打边炉，但原来佢出名嘅系蒸笼饭。一坐低就梗系要叹下餐厅出名嘅八宝茶， 每一杯茶里面都配有菊花红枣等配料，唔系话一大壶水开到好稀嘅茶， 甘甜可口 ，$10茶芥可谓物超所值。是日炖汤系菜胆花胶炖鸡，每碗都非常足料，鲜甜味美，饮完唔觉得口干，应该冇乜点加味精。时菜炒鲜斑球嘅班块好腍好滑，西兰花球砌出嚟嘅大细非常之适合一口一件， 好快就清咗呢啲美食啦！蜜椒炒牛柳嘅牛柳新鲜滑溜，唔系话加咗松肉粉𠮶啲味道质感，炒埋三色椒配搭更加健康。芝士虾球伊面嘅芝士味比较清淡， 即使唔系好喜欢芝士味道嘅屋企人，亦都食到舐舐脷。 本身佢冇跟青菜或者葱亦都好迁就到拣饮择食嘅屋企人😅 虾球比较细，如果可以拣返大虾，效果加倍理想。浓汤杂菌浸鱼滑，杂菌同鱼滑嘅比例好平衡，唔系话少少鱼滑多多杂菌𠮶种偷工减料嘅感觉。加咗黑木耳，清淡中更为健康 健康。土鱿蒸肉饼鱿鱼鲜香同埋肉味都好突出 ，食入口嘅口感好细嫩，配饭食系一流嘅配搭，更加有家嘅感觉。当晚每人拣一道菜，拣拣吓竟然冇人嗌招牌菜，唯有下次再食啦。