豊洲水産海鮮丼専門店 (已結業)

东京筑地市场系令到我爱上食刺身嘅地方，入口即溶嘅大拖罗同香甜鲜美嘅海胆，令人回味无穷，忍唔住次次到东京都要去拜会。豊洲水产作为筑地市场内嘅一个批发商，近日打入香港市场，系呢度开设咗海鲜丼专门店。香港女性十个有十一个都中意食日本野，带喜爱鱼生嘅佢地黎食实无错。呢度环境宽敞，如果坐四人枱的话，仲系有木板同布帘隔开，增加私隐度。Menu数大页嘅海鲜刺身丼，令人花多眼乱，有预先配搭好嘅，亦有自选丼饭。想一次过试均多款美食，点左一个豊洲二重奏，贪佢有齐海鲜丼同炸鸡丼。海鲜丼包括带子、甜虾、黑鲔、黑鲔蓉、海胆，仲有松叶蟹，份量唔惹少。海胆、带子、松叶蟹甘甜。肥美嘅拖罗，未至于入口即溶，但充满油脂香，食落完全唔会有渣。刺身新鲜不在话下，拌碟亦特别用上青瓜粒等，拌饭后带爽脆口感。另一个唐扬炸鸡丼，炸鸡香脆可口。值得一提嘅系三文鱼蛋卷，粒粒三文鱼籽卜卜脆，蛋卷香口，个人都几喜爱呢个组合。套餐附送嘅面豉汤，同碗饭一样大碗，用料丰富，咸度适中带点鱼香。再叫左啲小食，有明太子蛋卷，甜甜嘅煎蛋卷，带少少明太子嘅咸味，又有口感。烧日本和牛串，和牛肉未够滑嫩，不过味道就不错嘅而且肉味都几浓郁。