香港烏賊中心 (已結業)

今日带日本客倾生意，倾完嚟咗呢无食嘢，店长超级热情，叫咗三个𩠌(日本人比较细食，我又唔好意思叫多啲。。。)首先系中既刺身拼盘，有吞拿鱼，AJI(唔好意思，唔识中文系乜，相中后面最大𠮶条鱼)，海胆同埋日本空运鱿鱼。刺身既新鲜程度唔在讲，味道真系正，尤其是鱿鱼，真系一只只独立包装之前一晚由日本空运，第二日中午生勾勾咁运嚟香港，到上枱时仍然变紧色，肉仲系透明，鲜味到不得了，同平时我地食十蚊八蚊一件白嘥嘥鱿鱼完全唔同一回事。问埋店员，原来啲鱿鱼空运返嚟死亡率都几高，而且每日卖晒每日清，今日冇预约都俾我地食到真系好彩，到我地走既时候真系一条都冇剩 。第二味系当造既秋刀鱼(生)刺身，秋刀鱼一定要好新鲜先可以生食，完全无平时𠮶啲腥臭味，充满油香，入口即化，正到晕(因为唔系成日有得食，所以我好钟意食)，最衰得四件，唔系我想食十件 。第三味系墨汁鱿鱼意粉，挂住食已经唔记得影相，意日fusion, 两个人食啱啱好既分量，意粉弹牙煮得啱啱好，墨汁既调味都好好。今次系个客请，但自己都想再嚟，正呀!价钱嚟讲，以佢既新鲜度一啲都唔贵，因为真正朝补晚尝，唯独系铺面比较窄，唔够阔落。