萬波 (已結業)

我都服左自己了，去台中几日都唔算饮好多手摇杯，反而喺香港饮。来自台中嘅万波地点上好方便我地，但而家尽量唔刻意去试喇，经开先。是日喺附近打完边炉，见唔多人就买杯过瘾啦。万波选址弥敦道，老炼咁远已经见到好光猛嘅门面，铺面几大，透明玻璃隐约可见厨房内部，装潢有种复古味，令我印象最深刻系好有节日气氛嘅杯子。店员好有礼，递上餐单。餐牌分奶盖茶、原茶、果茶、鲜奶、鲜奶茶等，大部分分中/大杯，定价$16-34。配料有粉圆、仙草、波霸等。奶盖有四款，分别有奶油布蕾、伯爵、黑糖、奶油oreo。冰度、糖度可自选，店员亦都会作建议。香草籽与咸奶油布蕾 $30/微糖/微冰一眼睇中呢款，个名几吸引兼后来先知系香港限定添。店员建议微糖、微冰，大乡里未饮过梗系听话啦。奶盖层面头烧得唔够耐，所以冇脆嘅效果。由于添加海盐，头几口饮落会有点咸味，唔会持续，云呢拿味好香，亦都见得到有好多云呢拿籽，确实好似食紧烤布蕾茶底为红茶，微糖刚好，有点茶涩，饮到后期会比较淡，中规中矩。但芝士奶盖有种新鲜感，属于可试之列。