皇后冰廳 (已結業)

喺荔枝角行街之后，朋友建议去长沙湾嘅皇后冰厅食饭，食完觉得都几有惊喜。餐厅重点推介生蚝同焗蚝，见佢嘅精选法国生蚝只系$20一只，仲要买五送一咁低，于是就要咗六只试吓。上枱见到只只生蚝睇落都真系好新鲜，虽然唔算好大只，但系食落好鲜甜，一啲都唔腥，钟意食蚝嘅一定要嗌嚟试吓。主菜要咗一个鲜茄焗猪扒饭，卖相好靓，闻落都好香。猪扒嘅份量都几多，食落唔会好干。啲饭系炒饭，夹埋啲芝士同茄汁一齐食，甜酸度啱啱好，真系好正。另外叫咗𠮶蓝青口海虾天使面，同样都系卖相超靓，总共有三只蓝青口，同埋两只海虾。青口都算几大只，海虾爽口弹牙。天使面软硬度适中，个人好钟意佢个汁，香口得来唔会太咸，成个配搭好好。跟餐加钱要咗沙律同埋餐汤，沙律嘅份量都几多，沙律菜好新鲜，配埋麻酱好开胃。餐汤系蘑菇粟米忌廉汤，入边有好多蘑菇同粟米，饮落唔会太稠又唔会太稀，好好饮。睇相见到佢嘅芝士磨菇酿鸡翼好似唔错，于是叫咗两只嚟试吓。上枱见到两只鸡翼都好饱满，卖相真系一流。切开入面又见到好多芝士同埋蘑菇，芝士唔会太咸，同蘑菇、鸡翼一齐食，真系好正，下次嚟嘅话都一定会再食。