發哥粥底海鮮火鍋 (已結業)

家人想食海鲜，我想食火锅，一于食海鲜火锅😂。观塘呢间发哥粥底火锅几隐世，门口系普通茶餐厅咁嘅样，望真啲先发现系朝早茶餐厅，夜晚打边炉，因此座位好多都系卡位，坐得好舒服。首先上枱嘅系炖汤，打边炉都有原盅炖汤饮，好滋补。汤非常足料、鲜味，正👍第二样系泰式青口。青口上枱热辣辣，配蒜蓉和泰式酱，甜甜地，青口鲜甜唔腥，好食😋食到第三样都未开始打边炉🤣！冰镇鲍鱼肉质紧实，但系一啲都唔韧，弹牙有惊喜。终于开始打边炉，米水汤底系冇味嘅，一开始要靠酱料帮忙，好彩海鲜够新鲜，鲍鱼非常活泼，仲喺只碟上面打交，新鲜到飞起！所有海鲜都洗得好干净，全晚冇食到一次有沙，而且新鲜就唔使夹硬渌好耐，保持到肉质有弹性。虾几新鲜，颜色鲜艳，咬落去仲有爽脆嘅感觉。特别推荐墨鱼滑和墨鱼丸，一定系自家制，既有海鲜嘅鲜甜味，又有一粒粒墨鱼口感，超正。配料都有质素，安格斯牛肉好浓肉味，鱼皮香脆，蔬菜新鲜。最后加粥底料煲粥，精华所在，为呢餐写下完美句号。