90s Lazy (已結業)

餐厅播住90年代日本歌，日式木系风格，环境干净整齐。餐牌有set dinner包是日餐汤及饮品，如特色饮品就半价。另外亦可散叫，种类偏多，价钱合理。最后我同老公就叫左两个套餐，然后再叫左个pizza，饮品半价就叫左拉花咖啡同乳酪特饮。是日餐汤：周打砚汤口感creamy，有西芹同红萝卜，饮得出蔬菜味道。懒人包：老公话呢个懒人包好吸引，仲丰富过平日嘅all day breakfast。有烟三文鱼、蕃茄、烟肉、猪肉肠、薯饼、炒蛋、烧烤肠、茄汁豆、粟米粒、杂菜沙律同牛角包，共11款配料。其中炒蛋炒得好靓，有晒蛋汁，烟肉煎到好香脆，牛角包好有牛油味，总之就系好饱，好好食。烤鸡肉鲜茄意大利饭：鸡肉烤得几靓，加左少少黑椒，鸡肉都算嫩滑。意大利饭煮得几正宗，咬落有口感，每一啖都充满酱汁，鲜茄味浓，里面仲有洋葱同菇等，甜甜酸酸，开胃好食。海鲜大板烧薄饼：有鲜虾同鱿鱼，另外仲有椰菜，食落清新爽口。酱汁系沙律酱，整体真系好有大板烧感觉，唔错。Mocha (热)：打卡之选，所有热饮都有拉花，mocha味道够浓，甜度刚刚好。芒果乳酪特饮：淡淡芒果味，乳酪酸酸少少甜甜，够冻，口感好rich，夏天饮佢就啱晒。