八王子居酒屋 (已結業)

晏昼喺度食嘢储起两张廿蚊Coupon，见未试过佢哋晚市就揾埋「日本狂迷」女朋友去试吓。𠮶晚女朋友话想饮吓酒兼食d鱼生寿司，问侍应有乜飞机货，佢话有针鱼、池鱼、帆立贝及粒贝等等。最后都系叫咗最大路嘅池鱼，然后叫咗帆立贝寿司、油甘鱼寿司及三文鱼籽寿司；再叫咗一个鱿鱼塩辛同芥辣八爪鱼做餐前小食；最尾清酒就叫咗上次朋友生日会饮过𠮶只「濑祭」！餐前小吃同正统居酒屋食𠮶d无乜分别，如果无酒饮而净食呢两只重口味小食都会觉得几咸吓，宜家用嚟送酒就啱啱好！接住嚟嘅系池鱼刺身，摆相几好而食落又食得出好鲜味，系行货d但真系唔错吓。跟住再上埋𠮶几款寿司，件件都好新鲜，尤其油甘鱼鲜甜爽口。三文鱼籽比我有d惊喜，以前食过𠮶d都系现成嘢好鬼咸，今次呢d好明显系自家腌制嘅，不过味醂味重咗d而塩渍反而唔够重，令味道偏甜咗d，同侍应反映过后希望下次有d改善。见个胃仲放得落野就叫多碗汤乌冬食吓，无乜特别，算渌得唔太差，个鲣鱼汤做得几好。