天下茶屋 (福榮街)

营业中

休息中

有次要去黄金商场买野，行返出黎时发现新开咗一间，门面好日式风格嘅餐厅，但可惜已经食过晚饭嘅关系，要等下次了。今日终于再去到𠮶头，午餐就决定系佢啦！佢地门面好简约，主要由灰色水泥同木柱组成，入到去就见到开放式嘅水吧，餐厅唔算大，但餐桌摆放方式令格局睇落宽敞，坐得舒服。我地二人叫咗咖哩牛肉汤乌冬，温泉蛋烤汁牛丼，日式炒杂菜，牛油杂菌帆立贝，三味芝士烧玉子。汤乌冬汤底虽然明显系用日式咖哩煮出黎，但味道都算浓郁，乌冬够入味。丼饭方面，牛肉比例算多，酱汁亦十分惹味，加埋温泉蛋，好味又邪恶，杂菜炒得好清爽唔过火，食得健康同时补充一下纤维。帆立贝送黎时以为送错，因为当时d菇遮住晒，虽然细细粒但都好好食。烧玉子带有甜甜嘅味道，加埋明太子，芝士等嘅调味，味道非常唔错。