重房 (已搬遷) 新店位置

新年前夕，当然要同BFF去食餐omakase开年。茶碗蒸好似布丁咁滑嫩，鸡蛋同高汤比例刚好。高汤有淡淡海鲜鲜甜味，茶碗蒸内藏原只大虾。平时少食鳕鱼白子，难得时令有机会一试。白子用盐油水焯至半生熟，上面配上萝卜蓉。调味用上日本辣椒同醋，能辟去鱼腥的味道，更能为白子提鲜。 池鱼以烟熏处理，令表面有油脂，但食落唔会腻。肉质嫩滑，味道甘甜。长崎蚝肉质creamy，细腻而饱满。配上橘子jelly，更突显蚝味道清甜，冇金属味。根据店员介绍矶煮鲍鱼花了两日时间用用酱汁及昆布炆，十分入味。另外设有鲍鱼酱，味道偏甜，同单食鲍鱼系唔同风味。由于用慢火煮，肉质仍保持鲜嫩弹牙。握寿司有银雪鱼、鲜虾同拖罗。店员细心建议我地依次序食，由淡去到浓味。 醋鲭鱼寿司卖相有心思，经轻轻烧后，用白昆布包上。右口鱼边手卷极有油甘味，配上樱花虾，味道有层次。马粪海胆鲜甜而没有涩味，果然系大海嘅味道。一口食完整而饱满嘅海胆好满足。午餐仲包括有烤青鱼、乌冬同埋日式甜品。美食一轮接一轮。Omakase好似开盲盒咁，令一餐嘅期待感大增，过程嘅享受确实一流。