MOS Burger (已結業)

近日唔知点解爱上「牡丹楼」新出嘅汉堡饱，因为佢地终于好似有少少开窍，汉堡扒有番啲肉汁，又识夹啲生菜同埋蕃茄，唔驶咁油腻。不过要讲到食汉堡饱，都系以前间Burger King好食好多。宜家山顶都有一间，不过冇理由下下都上山顶食汉堡饱。最近行经太古城，发觉开咗间响日本都几出名嘅汉堡饱专门店，所以响好奇心驱使之下(当然亦唔少得阿K嘅「鼓励」啦)，我地买咗嚟试吓。我叫咗个「摩斯芝士汉堡」，饱都几大个，汉堡扒亦比「牡丹楼」嘅至尊汉堡多肉汁。不过都系犯咗一个相同嘅毛病，就系面饱本身干争争，又唔系咁松软，只可说有汉堡饱嘅肉体而冇咗灵魂。一个整得好嘅面饱可以发挥画龙点晴之妙，暂时响香港都剩系响Burger King食得到。至于价钱就一啲都唔平，要成四十二蚊一个餐，包括一个汉堡饱、一包薯条及一杯饮品。如果平一啲嘅话，我嘅评价或者会高一啲。