空海 (已結業)

就快到纪念日，想同另一半好好庆祝一下。不过今年嘅纪念日喺平日，大家返工都忙，所以提早咗，响之前嘅周末庆祝。两个人都钟意食日本嘢，今次拣咗喺旺角嘅空海食晏昼饭。餐厅喺广华街嘅地舖，最抢眼唔系舖头名，而系招牌位置，大大只又立体嘅蟹，第一眼以为自己已经去咗日本。门口已经摆咗餐牌，不过字体比较细，行埋啲先睇得清楚。唔单止门口餐牌嘅字比较细，连餐厅面积都系，一共只系得八个座位，建议订位稳阵啲。餐厅提供唔同嘅套餐，亦有散叫。今日拣咗松叶蟹甲罗烧定食。前菜系豆腐，加咗芝麻酱同埋虾干，味道香浓，冻食豆腐又好啱呢个天气。味噌汤加入咗蟹肉，令味增汤不再平凡，海产香味就够吸引。轮到戏肉松叶蟹甲罗烧，系将个蟹壳伴入非常丰富嘅蟹膏，然后烧热。热辣辣嘅蟹膏更加甘香，伴著白饭享用，更够滋味。由于定食套餐唔包饮品，另外叫咗一杯巨峰提子梳打，甜美享受，亦好啱而家比较热嘅天气享用。