一糖 (屏山)

营业中

休息中

朋友介绍喺天水围西铁站后面有一间隐世嘅甜品店，佢话𠮶度嘅氛围直情好似去咗日本咁，呢轮因为疫情饿咗咁耐，就即刻去试下，离开天水围西铁站行经一条小路之后就系一糖，都只系需要几分钟，十分方便，去到见到呢一幅咁有日本 feel 嘅水泥墙就系喇。一糖除咗窝夫、绵绵冰、即撞豆腐花、香蕉船、心太软同沙冰等等之外，仲有好多款中式传统甜品， 带埋屋企嘅老人家嚟都啱食。抹茶椰汁红豆冰，呢个椰汁红豆冰绝对勾起我嘅童年回忆，但系一糖加入咗抹茶同埋雪糕，传统之余亦带点创新，红豆煮得够腍而唔会太甜，系我最钟意嘅味道。由于有少少肚饿，食甜品之前嗌少少咸嘢嚟顶下肚，估唔到呢度连鱼蛋烧卖肠粉都咁有卖相，呢度嘅鱼蛋相当高质，有陈皮味之余亦都好有咬口，肠粉亦都好滑溜，净系嚟食呢碟小食都已经值回票价。 Mocha 脆脆麻薯窝夫，呢度嘅窝夫最大嘅特色系窝夫里面系有麻薯夹心嘅，外层脆卜卜嘅窝夫里面包住嘅系软糯烟靱嘅麻薯，唔系咁多地方食到窝夫有咁嘅双重口感，淋喺面头嘅朱古力糖浆、棉花糖同白色嘅糖霜都为呢个甜品生色不少，一啖脆脆嘅麻薯窝夫，一啖曲奇雪糕，夫复何求。