黑木亭居酒屋 (清風街) (已結業)

天后开咗间充满日本风情食物质素又高嘅居酒屋🇯🇵凯撒海鲜沙律甚有fusion嘅味道，凯撒沙律酱够香，食落好开胃，特别嘅系佢加咗蟹籽、蟹肉、虾同埋带子，令普通嘅凯撒沙律变得好丰富。明太子鸡肉串上碟时已经闻到好香嘅炙烧味，鸡肉好腍，明太子沙律酱咸香，两者非常夹。甲罗烧味道浓郁充满鲜味，捞埋之后食到粒粒蟹子同蟹肉嘅口感，配多士食感觉就冇咁漏。油甘鱼刺身食得多，原来烧鱼鲛一样咁好味－鱼鲛只有大骨好易食，啖啖鱼肉唧上柠檬汁再点柚子醋更突显鱼油香。依份牛肉他他真系好惊喜！一片片嘅和牛入口即溶，有别于切粒嘅牛肉他他，反而更食到和牛嘅油香，连埋蒜片、葱花、萝卜蓉同洋葱丝一齐食又系另一种滋味。最后嗌咗杯好得意又有心思嘅蜜桃乌龙熊茶，熊熊其实系乌龙茶冰嚟，就算溶咗都唔会令饮品变淡，蜜桃味唔会过甜，可以解腻。