隠家拉麵工場 (已結業)

好早就发现呢间隐世贵价拉面店，寻晚终于黎撑台脚一试！第一次食沾面，呢间店得三种面两种蛋同几种配料，两个人叫左一黑一白，无意中听到店家讲原来两种面落嘅油系唔同的，又学到野！沾面出名汤汁浓而重口，为挂汤而特制。呢碗香料好多，汤汁浓而咸，味道香而不腻，但挂汤效果就一般。值得一提嘅系两种蛋，特色半熟煮蛋只有三四成熟，加入酱油柚子味道奇特，个人觉得一d都唔夹，因此两三啖就已放弃。反而系浓汤入面嘅温泉蛋熟得岩岩好，溏心黏稠，最重要系吸收左浓汤嘅鲜香，抵赞！最后不得不提嘅系呢度嘅叉烧，门口标榜非巴西黑心肉，肉质厚度肥瘦适中，外圈炙烧微焦，同酱汁嘅味道特别夹，非常入味，别具匠心！总括而言食物味道无惊喜而偏贵，但用料同态度可见用心。其实黎呢度就系食气氛嘅，睇食评以为好狭窄局促，但个人觉得好有日本街头风，大厨同店主都系钟意同客人倾计嘅日本人，收碗碟个阵讲日文，钟意日本文化嘅应该会同我一样觉得气氛好正，值得一试。