大伙頭 (已結業)

呢间餐厅嘅早餐，我食过不下30次，一直以来都觉得佢嘅份量系特别大份，味道唔错，大玻璃亦都容易睇车。钟意食佢嘅姜丝牛肉面，欧陆早餐同埋鸡扒/猪扒丁面餐。 早排门口频密抄牌，中过招之后，少去咗。今日重临旧地，叫咗一个欧陆早餐，猪扒，葱花炒蛋，煎太阳蛋，同埋烟肉。猪扒好明显比以前细件咗好多，以前块猪扒好似块面咁大，而且又厚，依家就系普通一块薄猪扒，仲分开咗一半，半块半块咁就好似啲头头尾尾搭埋。炒蛋煎蛋烟肉就正常。多士佢有三种选择，可以拣白面包，麦包，或者甜面包，多士都唔使加钱。佢以前嘅麦包多士好好食，自从转左黑糖麦包之后，就好少食，因为唔系麦包嘅感觉，似系一块黑色嘅白面包，冇麦包嘅咬口同颗粒，一啲都唔好食。 所以拣咗白面包。跟热饮，承惠$46 $46 一份早餐，冇咗大大块嘅猪扒，同埋好好味嘅麦包多士，去其他餐厅都有大把选择。不过佢系长期都好多人食早餐，朝头早食个早餐都系要等位嘅，咁当然有值得惠顾嘅地方。我谂门口停到车系一个好大嘅原因。希望佢嘅食物可以进步返！