茶茶台式料理 (已結業)

话说有次去阿木台湾面，等位等咗粒几钟，九点几先有嘢到肚😭，饿到啲肠都打结，当时见到隔离有间都系食台湾嘢，人流唔多，不过最初唔知系黄店，所以完全冇考虑。我嘅意志都算十分坚定😌。呢间叫茶茶台式料理，第二次经过时，终于入咗去帮衬，叫咗个沙茶牛肉汤面，下午茶时段加八蚊有嘢饮，我拣咗杯荔枝红茶。呢度个水吧好大，自成一角，相信饮品嘅水准唔差，果然不出所料，荔枝红茶既有荔枝清香，红茶亦浓而不涩，好饮，加上使用环保纸饮管，呢度要加分👍。以下午茶嚟讲，碗沙茶牛肉汤面算几大碗，椰菜，黄芽白，木耳，粟米等各种蔬菜居然占差唔多一半份量，好夸张，蔬菜爱好者肯定钟意😍。味道方面，可能由于汤比较多，沙茶酱味道略嫌不足，不过整体嚟讲，水准算正常。小店另一特别之处，系墙上面挂满画作，全部都系社区老店同猫猫嘅 crossover，好有趣。关怀小动物，关注社区，关注老店，呢度又有分加👍👍。