LA Restaurant & Dessert Bar (已結業)

最近发现咗一间几高质嘅餐厅，个位置就咁经过未必会特别留意，但佢地出品真系有惊喜。点咗几款食物，先嚟餐汤饮住先，我地加$20转咗酥皮汤超邪恶，酥皮大大覆盖住汤碗面，督开先知原来系南瓜汤，饮落好甜又creamy啊！餐包好脆仲可以配上鲜蕃茄沟嘅酱，内面有啲蒜所以食落有少少辣，好过瘾。其中一个主食点咗烤三文鱼配柠檬忌廉汁，超中我口味呢！烤三文鱼皮烤得好脆，一切亦感受到三文鱼好幼嫩，鱼肉食落好腍亦带鱼油香，就系外脆内嫩嘅呈现啊！仲试埋西班牙风干火腿薄饼，薄饼系薄批底所以食落轻盈啲，芝士同西班牙风干火腿系绝配，火腿焗完油脂出咗干脆啲另一种滋味。小食嗌咗两款都几有特色，半熟带子仲保持到鲜嫩系里头，串烧鸡软骨好香口有油脂，蘸侧面嘅酸辣酱或黑椒汁都好食！另外鹅肝多士只要套餐加$30就可以享用，份量同质素都无欺场。鹅肝一奉上就嗅到好香，食落入口即溶，下面多士十分脆，整体系好抵食啊！饮品好多选择，我地拣左Peach Flower及Bloody Orange，前者接骨木香好出，后面带酸味好开胃。