美味故事 (已結業)

喺网上见到旺角始创中心一带嘅呢间西餐厅，去到附近都算难揾，位置喺要行楼梯嘅旧楼，如果唔系网上一早book好枱揾定资料应该都未必见到。一坐低，店员都好好咁送每位食一杯西瓜沙冰，清清甜甜，喺咁炎热嘅天气下真系好解暑。今次叫左个套餐包2个set：首先上左餐汤，有蘑菇同南瓜汤，够热同浓度适中，配埋前菜沙律同小食一齐食，当中柚蜜寒天海藻沙律好开胃，酸酸甜甜嘅酱汁配上沙律菜，岩岩好中和返浓汤嘅腻。主菜叫左美国安格斯西冷，生熟度跟左佢哋厨师嘅预设，份量几多，肉质唔会太根几易入口，配上酱汁几惹味。另外点左牛油果酱鹅肝汉堡，卖相相当靓，牛油果酱加上鹅肝同芝士嘅汉堡食法，真系几邪恶。而每一客主菜都会配烟肉酸忌廉焗薯，唔怕唔够饱。野饮点左柚子蜜茶，味道正常，不过唔算好有惊喜。当日嘅甜品有两款，分别有蓝莓芝士蛋糕同金宝柠檬蛋糕，后者都几特别，因平时嘅晚餐甜品都相对前者少见，而食落都唔错，甜度适中而酸酸地又可以解腻。