常嚐食•深燒堂 (已結業)

天冻冻地，就好想念深圳烧烤，睇到哩间烧烤店好似几好味，咁试试啦。店铺唔算大，不过坐得都几阔落。烧烤有几十款可以拣，同埋都有唔少小食同埋主食，心思思乜都想试下。马蹄爽，清热下火，适合烧烤。脆皮鸡中翼, 烧得啱啱好，皮烧得脆啵啵，食落好香口，里面肉又唔会觉得好柴,仲好嫩滑。表面落咗好多孜然辣椒粉，真系同深圳口味好似。韩烧五花肉，一份好大劲抵食，五花肉少少甜味好juice，夹埋生菜一齐食劲好味。特式即制烟肉鸡肠串，烟肉包埋厨师鸡肉肠，一次过食咗两款配料，唔错。脆皮午餐肉，一份2件，表皮烧得脆啵啵，唔错。流心芝士丸，一串有3粒，火候掌握得几好，食落唔会觉得好干身，搭配埋辣椒粉一齐食，好味。快烧台湾肠原味，表皮好香口，里面爆晒汁，台湾肠甜甜好好味。烧越南海鲜酿蟹盖，哩个都几特别，食落似墨鱼滑/鱼滑多点，味道都好丰富。深烧花甲粉，份量好大，有花甲，金菇，豆卜同白菜。汤底系麻辣口味，红薯粉同花甲嗦晒汤汁麻辣味，最啱冬天食啦。哩间烧烤口味真系好好味，宜家返唔到深圳，唯有揾哩间铺头解解馋啦！