鳳城酒家 (已結業)

星期日阿爸又话要去饮茶，又系指定去凤城。其实我就麻麻地钟意凤城，虽然佢点心系做得唔错，不过款式实在少得可怜。一张点心纸只有大概20样点心，仲要系传统点心。所以唔会成日黎，otherwise食得一、两次就会厌。二楼11点开，于是阿妈就11点去攞位。不过正值金融海啸，生意奇差，唔洗等之余仲有大把位剩。真系静得好犀利。炸鱿鱼须保持一贯水准，新鲜炸起，好热带点脆口。鱿鱼粗身，唔韧。煎肠粉煎得唔肥腻，又唔会干得滞。肠粉滑身，有少许葱粒。细细碟，少食多滋味。蒸排骨份量少，但用上新鲜排骨，肉味十足。仲有一旧吸晒味嘅芋头。牛肉球好味，三大粒。弹牙，有香葱同少许陈皮味。姜葱牛柏叶份量多，姜葱味浓，且入味。牛柏叶爽口唔韧。腐皮卷又系新鲜即炸，烫口。香脆可口。每节都有一只虾、猪肉同韮黄。菜远牛肉河见到人地食好似好正，于是又整番碟食吓。较肥腻，献汁颇杰。牛肉嗱过，已无什味道。河粉几好，粗身滑口，但不太入味。点心质素系唔错，只怪款式太少。