有囍 (已結業)

有留意我哋A姐M佬都知，我哋最钟意就系打边炉，一个星期打足7日就唔得，但打足6日都真系无咩问题，因为有个黑洞胃M佬同牛肉系A姐，但系新加坡式嘅打边炉真系未试过，今日就去到太子嘅有囍试试啦！呢间餐厅光猛企理，又坐得舒服，最重要系一入嚟已经闻到药材味重嘅肉骨茶啦。肉骨茶汤底讲明新加坡式嘅打边炉，所以汤底都要有啲狮城感觉啦，除咗有喇沙汤底，仲有楜椒味版肉骨茶，而我哋就重口味啲，拣咗药材味版肉骨茶！上枱一刻已经闻到个肉骨茶药味好浓，我哋都未开始打边炉，个汤已经俾我哋饮咗一半，好彩加汤系用番肉骨茶，唔系普通清汤，我哋又可以再饮过喇。招牌手切本地肥牛呢个肥牛嘅脂肪比例较多，但食落又唔算好肥，仲几有咬口添。脆鲩鱼腩呢个系M佬必食推介，啲鲩鱼腩真系好脆，肉质好弹牙，唔腥又新鲜！不过，打鳞打得唔干净，食嘅时候要留意。自家手包云吞我A姐就大爱呢个云吞，粒粒都有半个拳头咁大只，入面嘅馅一啲都唔少，有2大只虾，好弹牙呀！除此之外，我哋仲食咗脆炸响铃卷、鲜肉青同油麦菜，样样都够晒新鲜！唯一嘅小提议系店员较生手，隔离枱同我哋都不时要追单。