富田和食亭 (翠屏北商場) (已結業)

上个星期六，系和乐村探朋友之后，一起行落楼梯，朋友推介呢间日本食店，见佢个铺头门面装潢唔错，便入去试下。老板话最新推出了不同类型嘅一人晚餐，好抵食，而且一至日都有得食。我哋一人叫咗一个餐，价钱由50多蚊至108蚊，选择好多，丰俭由人。我哋叫咗四个餐一齐食，一个系炭烧安格斯牛肩扒，一个系酱烧豚寸骨，呢两个价钱好抵，一个76蚊，一个64蚊，配埋乌冬，啲乌冬非常之弹牙，食落好有口感，豚寸骨烧到好香，闻到都流哂口水，而个牛肩扒就够瘦，又好有肉汁，啱我呢啲注重健康嘅人士。其他两个，喺出面嘅日本食店唔经常食到，一个系拖罗蓉海胆丼，虽然价钱最贵，108蚊，但系物超所值，啲拖罗剁成蓉，配埋海胆，个样有啲似咸蛋肉饼饭，拖罗蓉捞埋饭同海胆，食落啲肉汁渗哂喺啲饭度，饭同鱼嘅鲜味都出晒嚟，食完会上瘾！下次嚟，都一定要再食！最后一个就系炭烧海鲜拼盘，睇个餐牌真系想像唔到系乜嚟，不过都即管一试，原来呢个最抵食，平时一个鲭鱼套餐都要50几蚊，而家78蚊有鲭鱼, 虎虾, 帆立贝和墨鱼，仲烧得好好味添。