盈記四季養生麵館

营业中

休息中

有朋友响湾仔返工，间唔中都会约佢食lunch。行过几次见到有一间叫盈记四季养生面馆嘅舖头，每次都想试吓，结果今日就的起心肝。店舖响轩尼诗道，近修顿球场。装修都几光猛，原来开咗唔够一年。Menu好简单，主要分药膳鸡汤类，蕃茄汤同叻沙汤类，仲有几款小食。女性朋友拣咗药膳农场鸡加日本厚花菇。我就想试吓佢嘅叻沙汤配墨鱼春卷。另外再叫咗红油抄手同药膳上汤浸时菜。而两杯热饮系免费嘅，我哋都系叫咗热柚子蜜。食物上枱好快，朋友叫嘅农场鸡加花菇，一上枱已经闻到淡淡嘅药材香，我都饮咗两啖汤，药材味系淡淡的，唔会盖过个汤本身嘅鲜味，鸡有三大件，而最惊喜嘅就系个厚花菇，足足有成吋咁厚，炆得又淋又入味，好好食😋而我嘅叻沙配墨鱼春卷就相对普通。叻沙味都浓，但系椰香味就不足。墨鱼春卷可能系来货，冇乜特别，但都算合格。红油抄手个汁就可以再辣啲，而入面馅料嘅肉就比较碎，类似日本饺子嘅口感，味道都唔错。最后上嘅系药膳鸡汤浸时菜，今日嘅时菜系生菜。放响鸡汤入边，大大块嘅生菜劲吸鸡汤汁。而鸡汤正正就系鸡汤面嘅同一煲汤，所以都好好饮。整体来讲店舖主打药膳鸡汤，咁下次再帮衬就要揾啱重点啦。