人間有情粉麵專家 (已結業)

去太子整头前黎先呢度食个午餐;呢间餐厅真系包罗万有,门口有小摊位卖糖,地下食粉面,楼上雅座系西餐厅,以我性格系钟意更上一层楼多d。楼上地方唔太大,但都有间玻璃VIP房,入面仲有唔少艺人签名;自己坐系玻璃窗旁,景观虽然麻麻,头顶系天桥,对面系马路,但都算系开扬。呢度d餐价几特别,有分主菜只跟汤或饮品,或者汤、饮品两者皆有,有样更特别:餐包要加钱至有?!罗宋汤唔太浓,个人觉得有d清添,蔬菜都ok多,最特别系汤入面加有烟肉,所以味道同一般罗宋汤系唔同;因为无加钱,所以无包食。水牛城汁鸡扒意粉:鸡扒煎得金黄香脆,味道唔错,起码无雪味;意粉较幼身但又唔系天使面,煮得唔太淋,收货!水牛城汁味道食落都真系算辣,个人觉得好似用茄汁加泰式鸡酱混合,味道都过得去,但汁既份量太少,只够鸡扒用,可以多少少就更好;配菜系水煮青瓜、甘笋,味道清淡够晒健康。冻柠蜜罕有地唔再需要额外加钱,而且又够大杯!蜜糖份量好够,饮到西洋菜蜜味道,抵饮!服务方面算唔错,有位上年纪先生好有礼貌,每个客人离开都会温馨提示: 小心楼梯!!呢度有样最好系免加一免小费,的确可以为客人悭唔少,真的"人间有情"!