曾記粿品

营业中

休息中

嚟到曾记粿品。呢度嘅潮州粿品几驰名，见佢至少有十几款选择。谂住晌度食，姐姐话只买粿品嘅话要六个以上先可以堂食。当时无咩人，犹豫要边款时姐姐已经叫我哋谂快啲，佢又唔系黑面嘅，只系有啲唔耐烦。急速地拣咗五款，其中一款要两件，我哋就坐低，估唔到熟食市场啲冷气又几强劲。一直以为佢哋只有潮州粿，睇一睇张餐牌，原来仲有其他较常见嘅潮州菜式，如煎蚝饼同炒面线等。萝卜粿、韭菜粿（两件）、芋头粿、黑桃粿、绿豆蓉粿，各$6一件，姐姐仲将佢哋煎好晒添。刚煎好嘅关系，食𠮶阵全部都热辣辣。油份可接受，唔算非常腻。外皮煎得香口脆身，我觉得厚薄度比九龙城某店较薄，同埋比较烟韧而唔易散开。萝卜粿，白萝卜丝混有虾米，甜香调味得宜，系咁多款之中较多汁同出色嘅。韭菜粿，几香口，但味道稍咸。芋头粿，以为系甜嘅，原来咸嘅，除咗芋头粒外，仲有花生碎、青葱同虾米等，都几有嚼劲。黑桃粿、绿豆蓉粿，同样系绿豆蓉馅，只系黑色皮同白色皮嘅分别，甜度中等。对于佢哋嘅潮州粿第一印象良好，不过老店好多时都只卖实力而非卖服务，要去食嘅话就要有啲心理准备。