暢和麵家 (已結業)

本来下午一点已经食左个正式lunch，但素闻香港西区好多正野食，所以心血来潮想食多个「下午茶」去到畅和，见到系一间比较简朴茶记风既铺头，有别一般面档会闻到阵阵碱水味。本身未算好有期望，谂住食个猪杂米过下瘾就算。点知呢个时侯俾我见到墙上贴咗一张印住药膳醉鸡，即刻心心眼落order！入正题。。。药膳醉鸡当归味十足，而且酒味浓郁，相信酒既份量比坊间多，同时每一啖汤都饮到红枣同圆肉带黎既甜味。 药味、酒味、甜味三者平衡得劲好，以味道黎讲可以称得上系最强药膳醉鸡。由于已经食咗lunch嘅关系，我食晒成碗米已经好饱，饱到胃痛𠮶只，但个汤真系非常之好饮，我都忍唔住一啖一啖咁饮落去，一路痛一路饮、一路痛一路饮。。。一句讲晒，唔试你会后悔。至于猪杂米，相对地会比较失色，但都系好出色嘅，猪膶厚度同熟度刚好，喜欢食猪膶既人一定收货；猪腰既尿骚味已经处理到最好；其他杂位都非常干净，配合清爽带鲜既汤头，作为下午茶十分合适。 （我本人系朋友果碗度每样都食左啲，主力都系食番药膳醉鸡果边）仲有杯紫薯奶茶，本来以为系噱头嘢，点知佢味道同口感都混合得唔错，成件事系好夹嘅，唔会有一方偏重咗而导致口味错配，值得一试。