民華餐廳

营业中

休息中

虽然民华餐厅开咗好耐，但一直都冇入过去食，今日终于献出我嘅第一次，入咗去民华餐厅。民华既装潢同环境同一般茶餐厅大同小异，但值得一提，梳化位非常舒服。见佢餐牌写住「蕃茄汤底加炒蛋一同享用更美味」，我决定叫常餐。常餐总共包括三款食物，价钱都系$40左右，应该系我食过咁多间餐厅之中，常餐最平嘅一间。多款通粉之中我叫咗最传统嘅蕃茄牛肉通粉，分量足够，牛肉煮得几软稔，冇咩筋。蕃茄汤底唔系太酸𠮶种，甜酸程度适中，整体味道的确不错。常餐仲有火腿炒蛋同即烘牛油多士。炒蛋质感软绵绵，将多士同火腿炒蛋夹埋一齐食超正。其实常餐份量非常多，不过今日冇食早餐，所以叫多个西多士。西多士呈金黄色非常吸引，而且几厚身，加上外脆内软，所以好快就食晒。呢排天气非常炎热，当然要饮杯红豆冰，消暑解渴。出到门口发现民华有买新鲜滚热辣嘅面包。迟啲返工嘅时候可以嚟买面包当早餐。