Lagom Kaffe (已結業)

想系观塘揾间坐得舒服嘢食唔差嘅Cafe，我经常都会去lagom kaffe，最钟意冇限用餐时间，系我同朋友揾地方坐一日嘅恩物。台北炖牛肉意粉可以话系我每次再访呢间餐厅嘅原因。 大大块手掌咁大嘅牛肉非常足料，但就算冇肉净意粉我都会嗌，因为酱汁非常特别，系好重麻辣味嘅肉酱，可以话系麻辣版嘅谭仔炸酱，总之味道带一丝熟悉之余喺出面食唔到，一试难忘。Fish & chips都系食过几次，热辣辣新鲜炸起，粉浆唔会好厚，系啤酒炸鱼嘅柔软口感，鱼柳肉质都唔错，嫩滑有鱼味。 沙律并唔系为咗睇落组合完整而放落去，沙律菜真系新鲜爽脆，仲有蓝莓同新鲜切出嚟嘅粟米，好有诚意。炸软壳蟹牛油果Burger炸得非常酥脆，唔会太油腻，喺每一只蟹脚都炸得松化嘅情况下，味道其实已经赢咗大半，加埋开胃嘅酱汁同牛油果，包都烘得香口，做得唔错。