明苑粉麵茶餐廳 (已結業)

以前呢间茶餐厅系正我屋企楼下，所以周不时都会去食野。返学前黎食早餐，放学又食下午茶，不过搬左屋之后就好耐都无黎过。今日忽然谂起佢，就提议黎呢度食下怀缅一番。黎到既时候大概三点几，餐厅无咩人，半满都无，不过可能由于之后落大雨，所以突然间一大堆人涌入黎。虽然系下午茶时间，不过其实下午茶唔多选择，都系一D面包小食咁，但我好肚饿，所以最后都系叫左碗米粉食。我地分别叫左一碗牛什米，牛筋腩米，同埋一件我以前黎亲都食既奶油多。呢度既奶油多依旧好食，多士够薄同够脆，炼奶牛油一D都唔吝啬，食落去好浓牛油香，加埋甜甜既炼奶，真系非常好味。食既时候要小心，因为D奶油太多有时会滴到周围都系。不过牛什同牛筋腩米就麻麻地，先讲份量系够大碗既，食完都饱哂。不过米粉唔系几靓，食落有D粗糙既感觉，而且汤底亦唔够香，味道比较淡。牛腩非常瘦下，好偶然先夹杂少少肥膏，几靱下，好鬼(困)难食，好似食瘦肉咁食得好辛苦。牛肚够淋，牛肠够肥亦无异味，牛什系无咩大问题的。虽然佢未至于好难食，不过相比起旺角附近既餐厅其实佢唔算平，因为远少少既乐园同一碗牛什米只系卖$12，而且亦都系唔差既。所以，下次未必会再黎啦。