潮丸 (已結業)

位于金马伦道嘅呢间小店，里面嘅装修简约整齐，比起传统粉面店坐得更舒服，感觉更高级。幸好还未到晚饭时间，唔会坐得太过挤拥。餐厅叫潮丸，主打系丸类，但睇返餐牌，仲有好多招牌菜，例如牛三鲜，鱼三鲜，卤水拼盘，好多唔同款嘅小食。每一枱都有3款辣椒酱，有红椒，黄椒同传统辣椒油，试晒3只后，我比较喜欢黄椒辣中带甜。牛三鲜有牛腩，牛肚，牛根，但就无牛丸，所以唯有自己加$15特级牛丸王。特级牛丸王质感结实，好弹牙爽口，果然系特级！牛腩炆得好冧好入味，牛肚厚身，咬落去啖啖肉，唔会好靱，牛根又冧又有胶质，果然好鲜。鱼三鲜有鱼旦，鱼片头，同鱼皮饺。鱼旦好弹，好鲜甜，鱼片头同鱼皮饺亦一样好味，比平时任食火锅嘅更新鲜，更甜。卤水拼盘有好多款，有卤蛋，五花肉，猪手，猪大肠，豆腐。猪手大大件，好入味，猪手皮好弹牙，里面嘅肉炆得好冧。呢个拼盘份量超多，非常抵食。