霸嗎拉麵 (已搬遷) 新店位置

早排惊蛰打小人，就陪左一个鬼妹仔朋友去铜锣湾鹅颈桥见识见识，虽然，我地最后都冇亲身体验，但都系一个相当唔错嘅经验！见识之前，梗系要医饱个肚先啦。今次就同咗朋友去登龙街揾食，原本仲烦紧食咩好。点知去到就见到平时大排长龙嘅霸吗冇咩人排队，就即刻有决定，要食拉面！虽然，出面冇咩人等紧位，但入面依然好多人，但好彩上菜速度快，唔洗等太耐。我就拣咗我最爱嘅炙烧豚肉味玉拉面，炙热豚肉大大块，脂肪同肉嘅分布一层层，食落就唔会好油腻，炙热嘅煮法令到豚肉嘅表面会带有少少香脆，但肉汁亦唔会流失，仲保持到滑嫩；而糖心蛋就系我嘅至爱，一定不能错过！糖心蛋系原只上场，唔似一般铺头咁切开一半先上碟，可以比我慢慢食，又唔惊啲糖心蛋黄流哂出泥！依家午餐仲有小食优惠，加多12蚊就有多碟炸鸡或饺子，好抵食！而今次我同朋友就拣咗饺子，一碟有五只饺子，五只饺子有一层薄薄嘅脆皮连住，饺子皮香脆可口，饺子馅料系韭菜猪肉，份量啱啱好。最后，我偷食咗小小朋友嘅期间限定，特浓鱼介鱼干豚肉拉面，拉面嘅汤底多咗啲鱼鲜味，但又唔会太腥；鱼干唔算太硬，又唔会好咸，啱啱好。