Chatterbox Express

营业中

休息中

有肉骨茶嘅餐厅我都想试，金钟收工，同同事近近地就去试吓佢！都算好方便㖞，好近地铁站！我地18:20去到，可能仲未系食饭时间所以都唔算太多人！系收银到order完嘢食，就比左个机仔我地，要放系餐枱嘅指定位置到！我同同事两个人，各自叫咗一个餐，再加多咗个小食！同事叫咗文华海南鸡饭，鸡肉好软滑，最重要系鸡皮好爽，另外油饭嘅软硬度都好适中同埋真系好重鸡油香味，最后就系一碗鸡汤，虽然唔系话好特别，但都好清甜，配埋鸡油饭就啱啱好！好明显我就叫咗新加坡肉骨茶面线，一嚟到见到碗面，肉骨非常多起码有七旧，其实净系食啲肉都好够，我初头以为面线系米线，但系食落口啲面好弹牙，最重要系个汤，好好饮，好够胡椒味，又好够肉味！另外餐会跟咗四旧油炸鬼，浸埋落个汤度先食，真系完美！小食叫左黑酱油炒萝卜糕，个黑酱油味好好食，但系如果啲萝卜糕有煎下，可能会更加香口！不过不失！朋友好健康，叫咗柠檬薄荷梳打！我就好邪恶咁叫咗杯美禄恐龙，超够味，其实饮美禄最担心就系好淡好稀，但呢杯唔会，其实杯美禄一上到枱，我就知道我冇叫错佢！🥰总括虽然抱住试吓嘅心态，但肉骨茶的确冇令我失望，海南鸡亦出色！