十二味 (嘉峯匯)

营业中

休息中

之前帮衬开铜锣湾𠮶间十二味，印象好OK，之前都试过呢度附近两间其他酸菜鱼，怀著十二味应该更好食的期待入到呢间铺头。食物一摆上台就知唔对路，回锅肉唔似回锅肉，似系油炒猪肉加少少辣椒，啲油散到成个碟都系，肉淡而无味且处理生嫩，食左几块放弃了。酸菜鱼上台以为可以扳回少少分数，哇更加吓人！汤面一层油脂令人不想下筷，往时食酸菜鱼第一淡肯定系饮汤先，但今次啲油令我宁愿筷子夹鱼肉食算数！青菜就最后一个上，首先都系老毛病，劲量多油但又淡而无味，然后啲菜处理得比厨房新丁仲要求其，一大跳菜梗根本唔似系餐厅出品。求其填饱肚就走人，食咁多次酸菜鱼第一次有剩菜，亦都系第一次连红糖糍粑都唔叫就走。最后讲埋环境，窗外环境唔需要讲啦，地盘景。天气咁热情况下坐卡位竟然斋坐会出汗，完全feel唔到冷气，隔离台叫人开大冷气，个waitress竟然话「坐下坐下就凉架喇」。然后最搞笑系个音乐，原本冇开音乐，食到一半就见到啲侍应开后台音乐，一开，我同女朋友即刻笑出声，喂好心你抖音歌就唔好系餐厅放喇。非常不愉快的一次晚餐，环境食物服务三项都无法令人打合格分。