越北牛肉粉專門店

营业中

休息中

一碗粉、一条春卷加一杯热饮系午餐之选。香茅猪扒、金边粉、金不换、红椒粒同青柠全分开上。青柠呀青柠，有佢喺度，代表店主对做菜有诚意。猪扒份量坚多，肉唔系死实，咬得开，肉亦有味道，甜味较重。汤，并非强劲味精水，仲有少少金不换喺度，清香。加十二蚊食一条春卷，上枱时已一分为二，配菜有至爱金不换同爽脆生菜片。脆皮春卷入面塞满肉碎，味浓香，加埋金不换再沾橙色酸汁一齐食，十足食紧泰式香叶肉碎，每食一啖都觉得好幸福。酸辣凤爪𠮶汁，甜酸度刚刚好，凤爪肉地厚，入口好实在。隔咗一个礼拜去食晚餐，叫咗香茅鸡翼金边粉同春卷，上枱变咗香茅猪扒。今次碗粉同春卷都唔见有金不换，主动问店主攞先有。春卷依然系好味，猪扒依然系甜，甜过上次少少添。