食神麗宮

营业中

休息中

啱啱过完农历新年，仲有holiday mood, 又未要加班，放工后就俾朋友约去食佢留意咗好耐的中菜馆，话有名厨主理，搞到我好期待。今日星期一系平日晚市，唔算多人。环境跟一般茶楼一样普普通通，但胜在有空间感，唔会枱贴枱。有食神加持的餐厅会以为好贵，但睇睇餐牌，居然有惊喜唔贵wor，定价都算合理，就唔使谂咁多就叫了几个小菜。特酱烧乳鸽（$48只）- 系招牌菜之一乳鸽。皮烧得脆，而肉质保持鲜嫩多汁。叫咗一只，越食越滋味，下次可以一人一只。皇室咖喱牛腩配长城馒头（$168) - 另一个招牌菜。牛腩份量多，肉质算淋并且非常入味。咖喱香浓，带辛香微辣。我同朋友都大爱长城馒头，味道带甜同咖喱好夹，馒头有厚度，沾完咖喱汁，入口都外脆内软。蒜香玉乳脆鳝球（$168) - 味道偏浓，非常脆口，而个鳝的生熟度是刚刚好，肉质嫩口。最后，仲有两碗糖水送。小插曲见到食神出现同熟客打招呼，我仲听到佢地讲呢度冇味精，冇鸡精，食得安心。